Bergur Ebbi Benediktsson undirritar samning um gerð nýrra sjónvarpsþátta.
„Mikið ofboðslega hlakka ég til að hefja þetta verkefni,“ segir Bergur Ebbi Benediktsson, lögfræðingur og fjöllistamaður, sem hefur ritað undir samning nýrra sjónvarpsþátta, sem verða sýndir á Stöð 2 á næsta ári.
Bergur Ebbi greinir frá tíðindunum á Facebook. Þættirnir, sem kallast Stofuhiti, eru byggðir á bókum hans Stofuhita og Skjáskoti sem Mál & menning hefur gefið út undanfarin þrjú ár, ásamt nýlegri rannsóknum. Verða þættirnir fjórir talsins og í þeim mun Bergur Ebbi leitast við að greina mynstur og stærri hreyfiöfl í samfélaginu, með tilliti til nýtilkominnar tækni.
„Leikstjóri þáttanna verður hinn hæfileikaríki Magnús Leifsson,“ segir Bergur Ebbi sem mun stýra gerð þeirra, en framleiðsla er nú þegar hafin undir stjórn framleiðslufyrirtækisins Republik.
Með Facebook færslunnni deilir Bergur Ebbi mynd og segir: „Á myndinni hér fyrir neðan er allt sem ég mun þurfa næstu mánuðina: Kúlupenni, svartur iPhone, Stöð 2 kaffibolli, framleiðslusamningur og sprittbrúsi. Á myndinni er reyndar líka fólkið sem er að gera þættina með mér. Fólkið sem kemur að gerð þáttanna: f.v. Magnús Leifsson leikstjóri, Eva Georgsdóttir framleiðslustjóri Stöðvar 2, Þórhallur Gunnarsson framkvæmdastjóri Miðla hjá Sýn og Lárus Jónsson eigandi og framleiðandi hjá Republik.“