Bjarkey Olsen Gunnarsdóttir matvælaráðherra er undir stækkunargleri Sjóarans. Hún hefur alla jafna í mörg horn að líta og segist eiga það til að ofhugsa hlutina. Hún segir ískalt fjallavatn vera besta drykkinn og er lítið fyrir kók og pepsí. Bjarkey Olsen er að eigin sögn rökföst Excel-kona.
Fjölskylduhagir? Afskaplega vel gift honum Helga mínum Jóhannssyni. Börnin okkar eru Tímon Davíð, Klara Mist og Jódís Jana og svo eigum við barnabarnið og gullmolann, hann Tristan Amor sem er 13 ára.
Menntun/atvinna? Ég er kennari og náms- og starfsráðgjafi að mennt og starfaði sem slík fram til þess að ég var kjörin á þing 2013. Matvælaráðherra í dag.
Uppáhaldssjónvarpsefni? Ókei – fréttir og veðurfréttir – annars alvöru hasar og norrænar glæpaseríur.
Uppáhaldsleikari? Hinn breski Jason Statham er alltaf frábær.
Uppáhaldsrithöfundur? Eva Björg Ægisdóttir.
Bók eða bíó? Alltaf bók – Þúsund bjartar sólir.
Besti matur? Naut Wellington „made by me“.
Besti drykkur? Ískalt fjallavatn.
Nammi eða ís? Ís.
Kók eða pepsí? Hvorugt – lítið í gosinu, en Collab kemur endrum og sinnum inn.
Fallegasti staðurinn? Stórurð Borgarfirði eystri.
Hvað er skemmtilegt? Lífið og allar þær áskoranir sem það færir mér, en svona eitthvað eitt – að vera með Helga mínum í einhvers konar útivist.
Hvað er leiðinlegt? Na – almennt það sem ég kalla nöldur. Annars vel ég yfirleitt að horfa jákvætt á verkefni dagsins og þess vegna er ekki alveg valkvætt að eitthvað sé almennt leiðinlegt. En ókei, fólk sem nennir ekki að sjá fjölbreytileika lífsins – mér þykir það stundum leiðinlegt.
Hvaða skemmtistaður? Í dag er það ekki einhver skemmtistaður – miðaldra ég. En mér þykir gaman að dansa og þar sem stuðið er hverju sinni og ég er stödd – þá er ég geim.
Kostir? Ég er kona málamiðlana og lausna. Mér þykir almennt vænt um fólk og þykir gott að faðma og knúsa. Ég vil hafa skipulagið í lagi og er rökföst Excel-kona.
Lestir? Ég á það kannski til að ofhugsa oft hlutina og verð því óþarflega stressuð.
Hver er fyndinn? Svandís Svavars og Ari Eldjárn.
Hver er leiðinlegur? Öll þau sem nenna ekki að finna leiðir út úr leiðindunum.
Mestu vonbrigðin? Ekki upplifað þau enn.
Hver er draumurinn? Að við Helgi eldumst fallega saman.
Mesta afrek sem þú hefur unnið á þessu ári? Ekki búin að afreka það enn.
Ertu búinn að ná öllum þínum markmiðum? Ónei – í sumar eru mörg markmið ekki síst í hlaupum.
Vandræðalegasta augnablikið? Þegar ég færði Helga mínum gulu rósirnar í afgreiðslunni í sparisjóðnum þar sem hann var að vinna og hann hikaði.
Mikilvægast í lífinu? Mitt elsku besta fólk – Helgi minn, krakkarnir og ömmulingurinn.
Stækkunargler þetta birtist í nýjasta Sjóarablaði Mannlífs sem má lesa hér.