Davíð Roach Gunnarsson rífur Patrik Atlason í sig í nýrri færslu á Facebook.
Partrik Atlason eða Prettyboitjokkó eins og hann er stundum kallaður, gefur út nýtt lag í dag sem heitir sama um en lagið, sem er rétt rúmar tvær mínútur á lengd, samdi Patrik með þremur öðrum tónlistarmönnum. Davíð Roach Gunnarsson, plötugagnrýnandi og pistlahöfundur á RÚV er vægast sagt ósáttur við hið nýja lag og innihald þess.
„Í dag kom út nýtt lag með Patr!k eða Prettyboitjokkó. Inntak þess er að þú verðir að eiga fullt af peningum, flottan bíl og dýr föt til að eiga séns í sætar stelpur. Þetta kemur frá manni sem fæddist inn í ríkidæmi og montar sig af því við hvert tilefni, sem er í eins mikilli forréttindastöðu og hægt er, neppasta nepo-beibíð af þeim öllum. Sem var verið að tilnefna sem „flytjanda“ ársins á íslensku tónlistarverðlaununum.“ Þannig hefst Facebook-færsla Davíðs, sem hann birti fyrir stundu. Segist hann vera „gróflega misboðið“ með það hvað mest allt samfélagið bæði „kóar með þessu rusli“ og „hampar því.“
„Mér er gróflega misboðið hvernig nánast allt samfélagið ekki bara kóar með þessu rusli, sem elur á forheimskandi og mannskemmandi efnishyggju, heldur hampar því. Hvernig alls konar fólk sem almennt gefur sig út fyrir að vera vinstri sinnað og/eða femínískt flissar og spilar með í örvæntingarfullri tilraun til að virka ekki miðaldra (það er ekki að takast Óli Palli og Gísli Marteinn!).“
Að lokum segir Davíð að einhver þurfi að „öskra sig hásan þegar allir hinir í eyðimörkinni eru meðvirkir.“
„Ég var með uppgjörspistil fyrir árið 2023 í Lestinni um daginn sem átti eftir að rata á netið, þar sem ég ræði mikið um þessa allsherjar hnakkavæðingu samfélagsins og helstu birtingarmynd hennar PBT. Skil hann eftir hérna í kommentum fyrir áhugasama. Mér finnst ekkert gaman að vera hrópandinn, en það þarf einhver að öskra sig hásan þegar allir hinir í eyðimörkinni eru meðvirkir.“