Rapparinn Master P syrgir nú andlát dóttur sinnar, Tytyana Miller sem lést í gær, aðeins 29 ára að aldri.
Á eonline.com segir frá Instagram-tilkynningu frá hinum 52 ára Master P þar sem hann segir frá andláti dóttur sinnar og fyrrverandi konu sinnar, Sonya C. „Fjölskylda okkar er að glíma við yfirþyrmandi sorg vegna andláts dóttur minnar Tytyanaa. Við biðjum vinsamlegast um að okkur verði veitt næði svo fjölskyldan geti syrgt. Við kunnum að meta allar bænirnar, ástina og stuðninginn. Andleg veikindi og fíkniefnaneysla eru alvöru vandamál sem við megum ekki hræðast að ræða. Með hjálp Guðs, komumst við í gegnum þetta.“
Ekki hefur dánarorsökin verið gefin út.
Tytyana varð þekkt eftir að hún kom fram í þættinum Growing Up Hip Hop en árið 2016 ræddi hún við föður sinn í þætti, um fíkniefnavanda sinn þar sem hún játaði fyrir honum að hún ætti við vandamál að stríða og þar sagðist hún ætla í meðferð.
Fyrir þau sem ekki vita hver Master P er þá er hann með þekktari röppurum Bandaríkjanna en eftir hann liggja 15 plötur en einnig hefur hann leikið í kvikmyndum og sjónvarpsþáttum. Lagið hans Make ‘Em Say Uhh! var árið 2008 númer 94 á lista yfir 100 bestu rapplög sögunnar hjá sjónvarpstöðinni VH1.