Guðni Th. Jóhannesson, forseti Íslands, mun fara á þungarokkshátíðina Wacken Open Air í Þýskalandi.
Fjórar íslenskar hljómsveitir munu spila í ár á þungarokkshátíðinni Wacken Open Air. Um er að ræða eina þekkustu og virtustu tónleikahátíð í heimi. Íslensku hljómsveitirnar sem spila á hátíðinni eru Skálmöld, Sólstafir, The Vintage Caravan og Krownest og hafa aldrei fleiri íslenskar hljómsveitir spilað á hátíðinni en hátíðin hófst í gær.
Guðni Th. Jóhannesson, forseti Íslands, verður heiðursgestur á hátíðinni samkvæmt tilkynningu frá forsetaembættinu. Mun hann þar fylgjast með íslensku hljómsveitunum og ræða við þær baksviðs. Þá mun hann taka þátt í pallborðsumræðum með skipuleggjendum hátíðarinnar þar sem rætt verður um þungarokkssenuna á Íslandi og tengsl hennar við norrænan menningararf.