Þrír særðust, þar á meðal rapparinn Kodak Black, fyrir utan skemmtistaðinn The Nice Guy í Los Angeles á föstudagskvöld en innandyra hélt söngvarinn Justin Bieber fyrirpartí fyrir komandi Ofurskál í bandarískum ruðningi sem fram fer á sunnudagskvöld. Kodak Black, sem er þekktur rappari þar ytra, var skotinn í fótlegginn eftir að hafa lent í útistöðum við mann sem taldi sig eiga eitthvað vantalað við félaga hans. Átökin áttu sér stað undir lok partísins sem hver stórstjarnan á fætur annarri heimsótti.
Meðal gesta voru rapparinn Drake, leikararnir Leonardo DiCaprio og Tobey Maguire ásamt Kardashian-systrunum þeim Kendall og Khloe. Tveir aðrir særðust í skotárásinni en samkvæmt fréttamiðlinum TMZ voru þeir særðu úr vinahópi Kodak Black. Þeir voru nýkomnir út af staðnum þegar slagsmál brutust út en samkvæmt sjónarvottum stökk Kodak Black til þegar ráðist var á vin hans og í látunum var fjölmörgum skotum hleypt af. Eins og áður sagði hlaut Kodak Black skotsár í fótlegg og var fluttur á sjúkrahús og er líðan hans eftir atvikum.
TMZ birti myndskeið af slagsmálunum og sést þar rapparinn slást á gangstétt fyrir utan staðinn þegar skotunum er hleypt af.