Áhrifavaldurinn umdeildi Edda Falak birti nýlega mynd af sér í nærfötunum einum saman á Instagram sem sló rækilega í gegn. Margir hrósuðu henni fyrir myndina, einn notandi var sérstaklega ánægður með Eddu: ,,Ísland á verra skilið, takk fyrir að blessa þetta vesæla sker með því að vera hérna og gera heiminn betri.“
Þrátt fyrir almennt jákvæð viðmót til Eddu eru alltaf einhver rotin epli sem hafa fátt gott að segja en í kjölfar myndbirtingarinnar fékk hún skilaboð með spurningunni ,,Má ég forvitnast? Af hverju ertu búin að fitna? Ekki illa meint samt“. Edda er þekkt fyrir það að standa með konum og tala fyrir réttindum þeirra en hún deildi í ,,story“ á Instagram sinni skoðun á þessu máli:
„Kannski ekki illa meint en af hverju skiptir það máli fyrir einhvern? Ég veit ekki endilega til þess að ég sé búin að fitna en ég er vissulega ekki jafn skorin og áður. Ég fæ endalaust af skilaboðum þar sem fólk finnur sig knúið til þess að segja mér hvernig ég lít út, hvernig ég ætti að líta út, hvað má gera, hvað má ekki gera, hvað sé viðeigandi, hvað sé óviðeigandi, að ég sé óörugg, að ég sé athyglissjúk, að ég sé of skorin, að ég sé of mössuð, að ég sé of mjó, að ég sé með of feit læri og að ég sýni of mikið.“
Hún heldur áfram: „Þú mátt pósta mynd þar sem þér finnst þú vera falleg, þú mátt segja sjálfri þér að þú sért sæt og flott og heit. Fólk sem er að glíma við óöryggi elskar að dæma annað fólk fyrir sjálfsöryggi sitt. Fólk sem vill það sem þú hefur elskar að brjóta þig niður,“ segir hún.
„Þú mátt síðan alveg fitna og þú skuldar engum útskýringu af hverju þú fitnaðir.“