Stórsöngvarinn Geir Ólafsson brá sér í fjallgöngu á miðvikudaginn. Gangan var vegum Næsta skrefsins og Hliðarskrefsins, gönguhópa Ferðafélags Íslands. Geir er ekki þekktur fyrir að stunda fjallgöngur en mætti sem leynigestur eins og oft er á dagskrá í miðvikudagsgöngum félagsins. Geir stóð sig með mikilli prýði í göngunni og gaf engum eftir á leiðinni upp fjallshlíðina. Á efsta tindi tók hann síðan lagið ásamt kór gönguhópsins. Hann leyfði fólki að heyra háa Cið sem hann tekur með þeim tilbrigðum að hundar á fjallinu spangóluðu. Þá sagði hann sögur af sjálfum sér og öðrum sem féllu í góðan jarðveg.
Fyrir gönguna var getraun á samfélagsmiðlum með vísbendingum um það hver leynigesturinn væri. Þetta voru eftirfarandi vísbendingar voru birtar nokkra daga í röð:
Guð blessi Ísland. 2. Aðalsmenn. 3. Dúnsængur. 4. Eftir mjaltir er messa. 5. Jólatónleikar. 6. Nancy Sinatra.
Göngugarpurinn Sigurrós Einarsdóttir fann svarið eftir þriðju vísbendingu og hreppti að launum hvorki meira né minna en tvo miða á jólatónleika Las Vegas Christmas Show í Gamla Bíói í desember ásamt þriggja rétta hátíðarmáltíð.
Lesendur geta spreitt sig á því að svara því hvað er að baki vísbendingunum í athugasemdakerfi fréttarinnar. Verðlaun verða veitt þeim er fyrstur kemur með fullnægjandi rökstuðning.
Geir Ólafsson á efsta tindi.
Leynigestir munu mæta á Úlfarsfell á vegum Ferðafélags Íslands á miðvikudögum kl. 18 fram í desember. Göngurnar eru öllum opnar. Fyrstu vísbendingar hafa verið birtar um næsta gest. Sú fyrri er Breiðholt en næsta er hestar. Vísbendingarnar er að finna á síðunni FÍ Hliðarskrefið á Facebook.
