Rapparinn Gísli Pálmi Sigurðsson var á mánudaginn dæmdur í Héraðsdómi Reykjavíkur til að greiða 420 þúsund krónur í sekt fyrir að aka án ökuleyfis og undir áhrifum en Vísir greinir frá þessu.
Í dómnum segir að Gísli Pálmi hafi verið stoppaður á ferð sinni um Klapparstíg í janúar fyrr á þessu ári. Við nánari skoðun kom í ljós að rapparinn hafði ekki réttindi til að keyra en hann hefur tvívegis verið sviptur þeim réttindum undanfarin ár meðal annars vegna vímuefnaaksturs. Þá sýndi blóðsýni að hann var undir áhrifum kannabisefna. Gísli var ekki viðstaddur þegar dómur var kveðinn upp en hann býr í Lundúnum í Englandi.
Gísli var um tíma einn vinsælasti rappari landsins en hann hefur látið lítið fyrir sér fara í tónlistarheiminum síðan 2015 þegar hann gaf út fyrstu og einu breiðskífu sína. Í gegnum árin hefur Gísli rætt við fjölmiðla reglulega um að hann hafi átt við fíkniefnavanda að stríða.