Verk eftir myndlistarmanninn Harald Jónsson hafa verið áberandi í ársbyrjun en hann hélt eina stærstu myndlistarsýningu ársins fyrstu þrjá daga þess. Var sýningin haldin í samstarfi við Billboard ehf, Y Gallery og Listasafn Reykjavíkur. Sýningin þessi nefndist Auglýsingahlé og er þetta þriðja árið í röð sem hún er haldin.
Verkum Haraldar var varpað auglýsingaskilti víðs vegar á höfuðborgarsvæðinu og er Haraldur kátur með sýninguna. „Mér finnst þetta magnað framtak hjá Y Gallery og Listasafni Reykjavíkur að ráðast í þessa framkvæmd og þessa samkeppni,“ sagði Haraldur í samtali við RÚV. „Þegar ég sá þetta á sínum tíma vakti þetta áhuga minn og ég fór alvarlega að hugsa um að þetta myndi henta mér mjög vel.“
Verk Haraldar heitir Ummyndanir og er í raun þrískipt. „Fyrsti þátturinn var forleikur. Einföld hnit sem leiddu okkur inn í nýja árið og gáfu tóninn,“ sagði Haraldur. „Annar þáttur eða annar dagur, þá eru í raun og veru slegnir líkamlegri tónar og holdlegri og efniskenndari kannski. Þriðja daginn, lokadaginn, þá förum við aftur yfir í ákveðna eimingu, ákveðinn einfaldleika.“
„Mér finnast þessi ljósaskilti vera stórkostlegur vettvangur til að sýna myndlist í opinberu rými,“ sagði myndlistarmaðurinn geðþekki.