„Við Soffía leggjum mikið upp úr fullkomnu heimilishaldi og að jafnréttis sé gætt í hvívetna. Okkar mentorar í þessum fræðum eru Þorsteinn kynjafræðingur og frú og það er helgistund hjá okkur þegar hlaðvarpsþáttur um Karlmennskuna fer í loftið. Bestu þættirnir eru þegar hjónin tala við hvort annað eða Sóleyju Tómas. Svo er þetta fólk allt svo skemmtilegt eins og alþekkt er hjá réttlætisriddurum“ ritar Brynjar Níelsson fyrrum alþingismaður í nýrri færslu á Facebook.
Færslan hefur fengið gríðarleg viðbrögð og mörgum fundist hún fyndin. Í henni deilir Brynjar og skýtur föstum skotum á þriðju vaktina.
Brynjar leiðir lesendur hvernig fyrirkomulagi þeirra hjóna er háttað: „Leiðbeiningar sem við fáum frá þessum jafnréttisfrömuðum eru teknar svo alvarlega hjá okkur Soffíu að við höldum excel bókhald um allt heimilishaldið. Hver keypti inn og eldaði matinn, gekk frá eftir matinn, skúraði, þvoði bílinn og svo framvegis. Meira að segja skráð hvort hafði frumkvæði að ástarleikjum og hvort lagði meira á sig í leiknum.“
Hann segir farir þeirra hjóna ekki alltaf sléttar af fyrirkomulaginu: „Þrátt fyrir þetta verður stundum ágreiningur um hvort skráningar séu alveg réttar og nákvæmar og hversu vel verkin voru unnin. Til að leysa þann ágreining teljum við Soffía nauðsynlegt að komið verði á einhverri eftirlitsstofnun á vegum ríkisins og sjálfstæðri úrskurðarnefnd til að leysa úr ágreiningi. Heimilisverkin eru nefnileg ekki einkamál hjóna og sambúðarfólks heldur spurning um í hvers konar samfélagi viljum við búa.“
Brynjar telur starf Þorsteins kynjafræðings mikilvægt en vanmetið: „Viljum við ekki öll réttlæti og sanngirni? Frelsi og ábyrgð einstaklingsins á hér auðvitað ekkert við. Við sem samfélag verðum að tryggja réttlæti og sanngirni í heimilisverkum eins og öðru. Óskiljanlegt að löggjafinn hafi ekki sett heildstæða löggjöf um heimilisverk með tilheyrandi eftirliti og þungum viðurlögum við öllum brotum.“
Hér að neðan má sjá færslu Brynjars í heild: