Framlag Íslands til Eurovision 2024 er í frjálsu falli á lista helstu veðbanka heims. Er svo komið að Hera Björk er einu sæti frá því detta út í undanúrslitunum, gangi spárnar eftir.
Sjá einnig: Ísland heldur áfram að hrapa niður lista veðbankanna – Hera kæmist samt í úrslitin
Mannlíf sagði frá því 15. mars að lagið sem keppir um hylli Evrópu í Eurovision söngkeppninni í Malmö sem fram fer í maí, Scared of Heights, sem Hera Björk Þórhallsdóttir syngur, hafi hrapað niður lista helstu veðbanka heims og væri komið niður í 19. sæti en þegar best lét, var Íslandi spáð fyrsta sætinu en þá var Palestínumaðurinn Bashar Murad talinn sigurstranglegur í Söngvakeppni sjónvarpsins. Þrátt fyrir að vera spáð 19. sætinu, myndi Hera Björk auðveldlega komast áfram í úrslitakvöldið en flest lögin sem keppa í fyrri undanúrslitunum með íslenska framlaginu, var á þeim tímapunkti ekki spáð glæstum árangri.
Nú, rúmum tveimur vikum síðar heldur Hera Björk áfram að hrapa niður lista veðbankanna og er nú dottin niður í 24. sæti. Nokkur af þeim lögum sem keppa við hið íslenska á fyrra undanúrslitakvöldinu hafa svo færst ofar á listanum sem þýðir að nú er Scared of Heights á barmi þess að falla út. Tíu lög komast áfram af 15 fyrra kvöldið en íslenska lagið er nú síðasta lagið sem kæmist áfram.
