Hundur sjónvarpsstjörnu drepinn af sendli

Leikkonan Angie Harmon greindi frá á Instagram því að sendill hafi drepið hundinn hennar.

Mikil sorg ríkir á heimili Angie Harmon, sem er þekktust fyrir leik sinn í Law & Order, þessa daganna. Ástæðan er sú að fjölskylduhundurinn Oliver var að hennar sögn drepinn af manni sem var að koma með matarsendingu til fjölskyldunnar. Leikkonan greinir frá þessu á samfélagsmiðlinum Instagram en atvikið gerðist í Charlotte í Norður-Karólínu þar sem Harmon býr.

Þá heldur hún því einnig fram að sendillinn hafi vitað að öryggismyndavél sem hefði átt að ná atvikinu á upptöku sé biluð og hann hafi nýtt þá vitneskju til að komast upp með skjóta hundinn. Sendillinn, sem gengur undir nafninu Merle, heldur því fram að um sjálfsvörn hafi verið að ræða en Harmon segir slíkt vera bull. Það hafi ekkert sést á sendlinum eftir hina meintu árás. Sendlinum Merle hefur verið vikið tímabundið úr starfi meðan fyrirtækið sem hann vinnur fyrir rannsakar málið.

Lögreglan í Charlotte segir að hún hafi rannsakað málið og sendillinn verði ekki ákærður fyrir að skjóta hundinn.