Leikkonan og Íslandsvinurinn Rebel Wilson gekk að eiga Ramonu Agruma í Sardiníu á laugardaginn.
Á ljósmyndum sem teknar voru í brúðkaupi þeirra sjást þær haldast í hendur í hvítum kjólum með blóm í hárinu og blik í augum.
Brúðkaup Rebel og Ramonu hefur haft langan aðdraganda en Rebel opinberaði samband þeirra árið 2022 þegar hún birti ljósmynd með yfirskriftinni: „Ég hélt að ég væri að leita að Disney prins … en kannski það sem ég þurfti virkilega allan þennan tíma var Disney prinsessa.“
Ljósmynd: Instagram-skjáskot
Þær trúlofuðu sig á Valentínusardaginn árið eftir en spurningin var borin upp fyrir utan Þyrnirósarkastalann í Disneylandi í Kaliforníu.
Rebel eignaðist dóttur sína, Royce, með hjálp staðgöngumæðrun á milli þess að tilkynnt var um samband hennar og trúlofun þeirra og er Ramona nú annað foreldri Royce.