Jón Gnarr minnist móður sinnar: „Hef aldrei eytt þér úr símanum mínum“

Jón Gnarr minnist móður sinnar í fallegri Facebook-færslu og segir að sennilega hafi hann orðið grínisti til að gleðja hana.

Mæðradagurinn var haldinn víða um lönd í fyrradag og kepptust notendur samfélagsmiðlanna við að birta ljósmyndir af mæðrum sínum eða barnsmæðrum og skrifa falleg orð, enda ekkert sjálfsagðara. Jón Gnarr lét ekki sitt eftir liggja og birti fallegan texta um móður sína Bjarneyjar Ágústu Jónsdóttur, sem lést fyrir 15 árum síðan.

„Mamma mín Bjarney Ágústa Jónsdóttir. Konan sem bjó mig til inní sér og kom mér útí lífið. Það sem ég sakna þín alltaf elsku fallega mamma mín. Ég á ennþá varalitinn þinn og hef aldrei eytt þér úr símanum mínum þó það séu 15 ár síðan þú fórst til Sumarlandsins. Skoða það alltaf í símanum mínum þegar ég kem frá útlöndum því ég var vanur að hringja alltaf í þig til að segja þér að ég væri lentur.“ Þannig hefst hin ljúfsára færsla Jóns. Segir hann svo að þrautseigjuna og staðfestuna hafi hann frá henni.

„Hugsa svo oft til þín elsku mamma. Þrautseigjuna og staðfestuna hef ég skuldlaust frá þér og er svo stoltur af því að vera líkur þér. Lífið var þér oft erfitt og ég sjálfur var þér oft erfiður sem barn og unglingur. En ég veit að þú veist að ég gat ekkert að því gert. Það var líka oft gaman hjá okkur, td. þegar við sungum saman með Kenny Rogers og Meat Loaf

Ég held stundum að ég hafi orðið grínisti til að gleðja þig og einhvernveginn bæta fyrir allt. Þér fannst líka gaman að þessu öllu.“

Að lokum segist Jón ætla að vera með varalitinn hennar í vasanum á mæðradaginn.

„Hvíldu í friði elsku mamma og vonandi sjáumst við aftur einn daginn. Ég verð með varalitinn þinn í vasanum í dag.“