Jón Gnarr vill rukka ferðamenn meira en íbúa: „Íslenskar sundlaugar eru á heimsmælikvarða“

Jón Gnarr vill koma á nýju kerfi varðandi þjónustu hér á landi, þar sem íbúar greiða minna en gestir meira.

Grínistinn og fyrrverandi borgarstjórinn Jón Gnarr veltir fyrir sér í Facebook-færslu í dag, hvort það væri ekki hægt að koma á nýju kerfi hér á landi þar sem fólk með kennitölu borgi vægara verð fyrir þjónustu á borð við sundlaugarnar, og ferðamenn sem hér eru sem gestir, borgi meira. „Íslenskar sundlaugar eru á heimsmælikvarða hvað varðar gæði og jafnvel nær því að teljast spa heldur en almenningslaugar.“ segir Jón meðal annars og bætir við: „Gætum við verið með eitthvað svona system sem gerði fólki með kennitölu kleift að borga minna en rukkaði gesti meira? Væri jafnvel hægt að styrkja allskonar rekstur með þessum hætt?“

Færsluna má lesa í heild sinni hér fyrir neðan:

„Við íbúar í þessu landi erum saman að reka þjóðarskútuna, fjármögnum innviði og niðurgreiðum ýmsa þjónustu, einsog td glæsilegar sundlaugar um allt land.

Ég hef oft velt því fyrir mér, núna þegar túrismi er orðinn frekar mikill og gæti þess vegna aukist enn, hvort hægt sé að finna einhverja leið til að láta ferðafólk greiða sanngjarnt verð (kostnaðarverð) fyrir þjónustu frekar en að njóta til fulls þeirrar niðurgreiðslu sem íbúar hafa fjármagnað.

Sundlaugar eru ágætis dæmi. Þær eru ríkur hluti af íslenskri menningu og það eru sveitarfélögin sem reka þær. Íslenskar sundlaugar eru á heimsmælikvarða hvað varðar gæði og jafnvel nær því að teljast spa heldur en almenningslaugar.

Gætum við verið með eitthvað svona system sem gerði fólki með kennitölu kleift að borga minna en rukkaði gesti meira ?

Væri jafnvel hægt að styrkja allskonar rekstur með þessum hætti ?“