Hinn margbrotni tónlistarmaður Kanye West hefur verið iðinn við að koma sér í
fréttirnar fyrir hina ýmsu hluti í gegnum árin. Núna hinsvegar snúast fréttirnar um
bitran skilnað þeirra Kanye og Kim Kardashian en eins og margir vita þá hefur sú
síðarnefnda byrjað að hitta nýjan strák, ef svo mætti að orði komast. Sá heitir Pete
Davidson og er þekktur uppistandari og leikari í hinum þekktu sjónvarpsþáttum
Saturday Night Live eða SNL.
Þeir eru eins ólíkir og hægt er að vera og því þótti það mikið fréttaefni þegar Pete og
Kim fóru að slá sér upp saman. Reyndar virðist allt fréttaefni þegar það kemur að
Kim Kardashian en þessar fréttir virðast þó hafa farið illa í rapparann Kanye West
sem nýlega breytt nafni sínu í „Ye“.
Í nýju lagi frá Ye, sem skartar engri annarri en dívunni Aliciu Keys og rapparanum
Fivio Foreign, kemur ansi áhugaverð setning sem bandarískir fjölmiðlar hafa reynt
að kafa ofan í og greina. Á ensku er setningin: „This afternoon, a hundred goons
pullin' up to SNL,“ sem myndi svo hljóma einhvern veginn svona á íslensku: „Núna
síðar í dag munu hundrað ofbeldismenn stoppa við hjá SNL.“ Bandarískir fjölmiðlar
vilja meina að þarna sé um að ræða hreina og klára hótun um ofbeldi og barsmíðar –
hótanir frá Ye sem beint er til Pete, sem er ein af stjörnum þáttanna.
Það er alþekkt að skilnaðir enda ekki alltaf vel og oftar en ekki situr annar aðilinn eftir
með sárara enni en hinn. Í þessu tilfelli er það augljóst að Ye á svo sannarlega erfitt
með að sætta sig við sambandsslit hans og Kim Kardashian en hvort þessar hótanir
um ofbeldi raungerist eður ei kemur tíminn aðeins til með að leiða í ljós.