Katrín Jakobsdóttir skrifaði sæta færslu á Facebook í morgun þar sem hún fagnar 20 árum með eiginmanni sínum, Gunnari Sigvaldasyni.
Forsætisráðherra Íslands, Katrín Jakobsdóttir á eiginmann sem á afmæli í dag en í ár er einnig 20 ár síðan þau kynntust. „Í ár verða tuttugu ár síðan ég kynntist þessum manni sem á einmitt afmæli í dag. Við höfum tekist á síðan um stórt og smátt en almennt höfum við það nokkuð gott saman.“ Þannig hefst krúttleg Facebook-færsla Katrínar en hún segir að sambandið sé ekki alltaf dans á rósum.
„Þetta er samt ekki tóm gleði og viðhorf okkar eru vægast sagt ólík til ýmissa hluta,“ skrifar Katrín og heldur áfram: „Og við erum með ansi mismunandi hæfileika. Hann er til dæmis borgarmaður sem ratar hvar sem hann kemur í útlöndum á meðan ég geng um með hausinn grafinn ofan í pappírskort (sem honum finnst mjög mikil 20. öld) og er algjörlega áttavillt.“ Þá segir hún þetta snúast við þegar snýr að Íslandi. „Hér heima snýst taflið við þar sem ég er jafn áttavillt en hef lagt flest veganúmer á minnið á mörgum ferðum. Man eftir einu sumarfríi þar sem ég var að tala við Þórólf sóttvarnalækni í síma (og var með hugann algjörlega við símtalið) og minn maður keyrði langleiðina niður í Fjarðabyggð þegar leiðin lá á Borgarfjörð eystri. En þetta heitir að vega hvort annað upp!“