Þórdís Kolbrún Reykfjörð Gylfadóttir utanríkisráðherra þvertekur fyrir að Friðrik Danakonungur hafi stigið í vænginn við hana eins og haldið var fram í áströlskum fjölmiðli og endurómað á Íslandi. Atvikið var sagt hafa átt sér stað í veislu sem haldin var til heiðurs forseta Íslands í opinberri heimsókn hans til Danmerkur. Kóngur og Þórdís sátu hlið við hlið í veislunni og þótti blaðamanni ástralska fjölmiðilsins sem kærleikar væru nokkrir með þeim. Þórdís Kolbrún tjáði sig við Vísi um þetta mál og var hneyksluð.
„Auðvitað er þetta ekki frétt. Það er enginn fréttapunktur í henni og hún stenst enga skoðun,“ segir Þórdís við Vísi og segir ömurlegt „þurfa að sitja undir þessum fáránleika“.
Danski konungurinn hefur verið talsvert til umfjöllunar í fjölmiðlum vegna meintrar kvensemi og hjónabandserfiðleika.