Linda Pétursdóttir, áhrifavaldur og fegurðardrottningin, hefur opnað á ástina á ný eftir þrjú einhleyp ár. Nú þegar aðventan er gengin í garð segir hún verið tilbúin í rómantískt samband á nýjan leik.
„Hér og nú þá ætla ég að stíga þetta skref og opna fyrir rómantíkinni og ég bara segi það að ég hlakka til að taka á móti ástinni. Uppáhalds tíminn minn til að vera ástfangin eru jólin. Mér finnst það algjörlega æðislegt. Þannig það er aldrei að vita hvað gerist,“ segir Linda í nýjasta hlaðvarpsþættinum sínum, Lífið með Lindu.
„Ég tek mér yfirleitt langan tíma á milli sambanda og mér hefur alltaf þótt gott að vera ein með sjálfri mér. Ég er sjálfstæð og ég þarf ekki á karlmanni að halda fjárhagslega til að sjá fyrir mér á neinn hátt. Það er komið að því að nú er ég tilbúin að opna á rómantíska ást aftur í lífi mínu. Ég ætla bara að segja það, ég ætla bara að setja það hér út í kosmósið að núna er ég tilbúin að hitta góðan mann, traustan mann, heimsmann, einhvern mann sem bætir við líf mitt,“ segir fegurðardrottningin.