Á dögunum kom út 8. ljóðabók Gísla Þórs Ólafssonar, Hafið… 20 cm í landabréfabók.
Í bókinni er boðið upp á ljóð um sammannlegar tilfinningar og á mannamáli þótt höfundur daðri á stundum við óvæntar myndir og líkingar. Velt er upp og snúið upp á hugmyndir um karlmennskuna en áhugasvið ljóðmælanda eru mikið til á skjön við hefðbundin karlmennskuleg gildi. Höfundur hefur áður ort um það hvernig samfélagið mótar okkur í norm og er hann hér enn á þeim slóðum. Inní þetta tvinnast allskonar tilfinningar og hugleiðingar rétt rúmlega fertugts karlmanns og er stiklað á innra lífi hans og viðbrögðum, en hann finnur sig betur í því að fara eigin leiðir heldur en að fylgja hinu hefðbundna út í æsar. Hafið… 20 cm í landabréfabók er 8. ljóðabók höfundar, en hann hefur einnig gefið út 5 plötur undir flytjandanafninu Gillon og nefnist sú nýjasta Bláturnablús, en hún kom út í fyrra. Árið 2013 kom út platan Bláar raddir en hún inniheldur lög við ljóð Geirlaugs Magnússonar.
Friðsæld
Var að hugsa um þetta friðsæla aðfangadagskvöld hjá okkur
og fannst eins og ekkert gæti grandað því
-engin áföll, ekkert áfall.
Ekkert stríð, engin öskur, enginn alkóhólismi
ekkert rifrildi, ekkert ofbeldi.
Engin veira. Enginn vírus.
Engin sprenging, ekkert slys.
Ekkert slíkt væri þá stundina
neinsstaðar í heiminum.