Í annarri þáttaröð The Kardashians mega áhorfendur búast við því að sjá meira af þeim Kim Kardashian og Pete Davidson saman, ef marka má nýja kitlu fyrir raunveruleikaþættina um Kardashian-fjölskylduna, sem framleiddir eru af Hulu.
Þau Kim og Pete byrjuðu að stinga saman nefjum síðasta haust eftir að hún kom fram í skemmtiþættinum Saturday Night Live. Þau virðast lukkuleg saman og Kim var farin að gefa áhorfendum örlitla innsýn í sambandið undir lok síðustu þáttaraðar.
Nú er ljóst að Pete mun eitthvað vera fyrir framan myndavélarnar í nýju þáttaröðinni og áhorfendur fá að fylgjast með þróun sambandsins. „Lífið er gott,“ segir Kim í nýju kitlunni fyrir þættina. „Ég er komin með nýjan kærasta. Ég er bara að skemmta mér mjög vel,“ segir hún.
Í einu atriði kallar Kim á Pete og segir: „Elskan, langar þig til þess að koma aðeins með mér í sturtu?“
Pete lætur ekki spyrja sig að þessu tvisvar, heldur kastar frá sér því sem hann heldur á og hleypur til hennar.
Í nýju þáttaröðinni eignast Kylie Jenner annað barn þeirra Travis Scott, Kris Jenner tekst á við einhverskonar heilsufarsvandamál og Khloé Kardashian segist enn trúa á ástina, eftir sambandsslitin við Tristan Thompson. Áhorfendur fá einnig að fylgjast með réttarhöldunum í máli Blac Chyna gegn Kardashian-mæðgum.