Gullregn, kvikmynd Ragnars Bragasonar, hefur verið valin inn á alþjóðlegu kvikmyndahátíðina í Toronto, Toronto International Film Festival, sem hefst þann 10. September næstkomandi. Ragnar segir það mikinn heiður að fá myndina tekna til sýninga á hátíðinni, enda sé hún á meðal virtustu kvikmyndahátíða í heiminum.
Séð og heyrt sló á þráðinn til Ragnars sem er nýkominn heim frá Póllandi og þurfti að fara í sóttkví en segir það hafa verið vel þess virði.
„Þetta er ein af þessum stóru hátíðum, hún er næststærst á eftir kvikmyndahátíðinni í Cannes, þannig að það er klárlega mikill heiður að vera þarna með mynd,“ segir Ragnar þegar hann er spurður hvað honum finnist um að kvikmynd hans Gullregn skuli hafa verið valin inn á hina virtu alþjóðlegu kvikmyndahátíð í Toronto.
Hann bætir við að það sé ekki síður ánægjulegt í ljósi þess að hátíðin hefur verið færð í nýjan búning í ár til að bregðast við breyttum aðstæðum vegna COVID-19. „Það verður að segjast eins og er að þetta verður svolítið spes útgáfa af hátíðinni út af faraldrinum. Hún verður eiginlega í niðursoðnu formi. Sýningar að hluta á rafrænu formi og helmingi færri myndir sýndar en vanalega. Þess vegna er gleðiefni að komast þarna inn með mynd í þessu erfiða árferði. Þetta er ákveðinn gæðastimpill fyrir myndina,“ segir hann.
Leiðinlegt að geta ekki verið viðstaddur
Ragnar hefur tvisvar fylgt myndum sínum eftir á alþjóðlegu kvikmyndahátíðina í Toronto, fyrst Fíaskó árið 2000 og svo Málmhaus þegar hún var heimsfrumsýnd þar við góðar undirtektir 2013. Hann segir alltaf gaman að mæta á hátíðina og því sé svolítið leiðinlegt að geta ekki verið viðstaddur hana núna. Það sé einfaldlega ekki í boði í ár.
„Þetta er ein af þessum stóru hátíðum, hún er næststærst á eftir kvikmyndahátíðinni í Cannes, þannig að það er klárlega mikill heiður að vera þarna með mynd.“
„Já, það er verst að maður skuli ekki komast. En staðan er sú að það verða engir erlendir gestir á hátíðinni vegna COVID-19, það er bara ekki í boði. Þetta verður meira svona „local“ en „global“, en í gegnum onlæn-útgáfu fær bransinn, blaðamenn og kvikmyndaáhugafólk aðgang að myndinni,“ útskýrir hann.
Furðulegt ár
Ragnar tekur fram að hann hafi þó fullan skilning á stöðunni. „Þetta er bara ástandið sem ríkir í heiminum í dag og þetta hefur verið vægast sagt sérstakt ár í bransanum, ekki síst hvað hátíðir varðar. Undir venjulegum kringumstæðum fylgir maður til dæmis mynd stíft eftir í kjölfar frumsýningar og ferðast með hana á alls konar hátíðir út um allt, kannski ekki eins og oft og maður vill en maður er samt á sífelldum þeyting. En ekki í ár. Hátíðin í Cannes, sem er sú stærsta í heimi, fór til að mynda fram í rafrænu formi, aðrar hátíðir liggja niðri og allt er lamasessi.“
Góðar viðtökur í Póllandi
Ragnar kveðst þó vongóður um að það fari smám saman að rofa til í bransanum. Til marks um það hafi Gullregn verið frumsýnd í Póllandi í síðustu viku og aðstandendum myndarinnar boðið á sýninguna. „Já, ég var að koma frá Póllandi þar sem myndin fer í almennar sýningar núna á fimmtudag í yfir 40 kvikmyndahúsum í öllum helstu borgum landsins. Það var bara verið að opna bíóin þar á nýjan leik eftir að þau höfðu verið lokuð um langt skeið. Ég var sem sagt viðstaddur forsýninguna úti síðasta fimmtudag og beit í það súra epli að þurfa að vera í sex daga sóttkví eftir heimkomu, en það var alveg þess virði þar sem þetta var skemmtilegt og svo er einn dómur kominn og hann er mjög jákvæður. Þetta er auðvitað íslensk-pólsk framleiðsla þannig að myndarinnar er beðið með talsverðri eftirvæntingu þarna úti,“ segir hann.
Framtíðin óráðin
Fram til þessa hefur kvikmyndin Gullregn einungis verið sýnd í tveimur löndum, í Póllandi og á Íslandi, en hún var frumsýnd í kvikmyndahúsum hér í febrúar á þessu ári og síðan gerð aðgengileg á VOD-leigum þar sem hún hefur notið vinsælda. Spurður hvað taki við eftir kvikmyndahátíðina í Toronto, hvort fleiri hátíðir séu fram undan, segir Ragnar að tíminn verði einfaldlega að leiða það í ljós. „Maður verður bara að spila þetta svolítið eftir eyranu,“ segir hann. „Sem betur fer er einn kostur kvikmyndarinnar sem listforms sá að hún lifir áfram. Hún finnur sér því alltaf áhorfendur með sínum leiðum, þótt síðar verði.“
Ýmislegt í bígerð
En eru einhver önnur verkefni á döfinni hjá leikstjóranum? „Ja, ég strengdi þess nú reyndar heit um síðustu áramót að setja ekki „deadline“ á mig þetta árið, þannig að ég hef bara notið þess að sitja við skriftir í ár og leggja drög að framtíðarverkefnum,“ svarar hann sallarólegur. „Það er nefnilega ýmislegt í bígerð fyrir næsta ár,“ bætir hann við svolítið leyndardómsfullur. „En það er of snemmt að ræða það á þessu stigi málsins.“