Grínistinn og leikkonan Rosie O´Donnell hefur nú staðfest orðróm um að hún sé komin með nýja kærustu. Hin sextuga leikkona birti ljósmynd í gær á Instagram en í gær hófst Pride-mánuðurinn í Bandaríkjunum.
Fram kemur í frétt etonline.com að kærastan heiti Aimee en lítið er vitað um hana annað. Af myndinni að dæma eru þær mjög hamingjusamar. Myndin birtist á Instagram-reikningi Aimee og undir hana skrifar hún „Gleðilegan Pride mánuð!“
Í síðasta mánuði kveikti Rosie á forvitni fólks með því að birta ljósmynd á Instagram þar sem hún hvílir hönd á læri konu og skrifar undir „Hvernig er helgin þín?“
Ljósmynd: Instagram-skjáskot
Rosie, sem margir muna eftir úr myndum á borð við A League of Their Own, The Flintstones og Sleepless in Seattle, á þrjú uppkomin börn með fyrrverandi eiginkonu sinni, Kelli Carpenter en þær skildu árið 2004. Þá var Rosie einnig gift Michelle Rounds frá 2012 til 2015 og áttu þær eina dóttur saman, sem nú er níu ára. Rounds framdi sjálfsmorð árið 2017.