Egill Helgason lastar Facebook í nýrri færslu á samfélagsmiðlinum.
Fjölmiðlamaðurinn víðlesni, Egill Helgason segir Facebook vera afar „eyðandi afl“ fyrir fjölmiðla, í nýrri Facebook-færslu. Segir hann samfélagsmiðilinn kippa undan fótum fjölmiðla sem deila hlekkjum á miðlinum af fréttum sínum, með því að draga verulega úr dreifingum þeirra. Segir hann að lokum netrisana vera alltof stóra og ábyrgð þeirra of litla.
Hér má lesa færsluna í heild sinni:
„Facebook er svakalega eyðandi afl gagnvart fjölmiðlun (jú, ég skrifa þetta hér á Fésið!). Fyrst kemur Facebook okkur upp á það að nálgast fjölmiðla í gegnum vefinn – nánar tiltekið hlekki á fjölmiðlaumfjöllun sem hér er dreift. Síðan kippir Facebook fótunum undan þessu með því að draga stórlega úr dreifingu hlekkja – núorðið hafnar algóritminn beinlíns í stórum stíl efni sem er dreift frá fjölmiðlum. Tekur varla að deila því. En gömlu dreifingarleiðirnar virka ekki heldur. Þar lenda fjölmiðlar aftur í klemmu. Allt ber að sama brunni. Netrisarnir eru alltof stórir og samfélagsábyrgð þeirra alltof lítil.“