Nokkrir norskir unglingar í Oslo, vildu mótmæla leiðinlegu samfélagi. Einn þeirra gekk full langt. Nágrannar heyrðu háværan hvell og svo eld í kjölfarið.
Það var þann 23. nóvember árið 2002 að nokkrir unglingar með spreybrúsa að vopni héldu að járnbrautargarð í útjaðri Oslo og ætluðu aldeilis að sýna „manninum“ hvað Davíð keypti ölið. Þeir vildu mótmæla ofur kurteisu samfélagi þar sem lestir komu alltaf á réttum tíma og grimm snyrtimennska réði ríkjum. Svo ákveðin voru þau að koma sínum mótmælum á framfæri að þau hunsuðu algjörlega fjöldi skilta sem vöruðu við háspennuhættu og klifruðu yfir nokkrar girðingar til að ná markmiði sínu.
Einn þeirra, 17 ára drengur, ákvað hins vegar að það væri ekki nóg að spreyja á hliðar lestanna, hann vildi spreyja þar sem enginn hafði spreyjað áður. Ofan á lestina hafði engum dottið í hug að spreyja á, fyrr en nú. Þessum unga, hugrakka manni var alveg sama þó enginn sæi ofan á lestina, hann yrði að koma hugmyndafræði sinni á toppinn.
Þessi unga hetja klifraði upp á lestina og tók við að spreyja á toppinn. Þegar hann hafði lokið við sköpunarverk sitt stóð hann upp til að lýsa yfir sigri sínum. Við það snerti hann aðal háspennulínuna og 15.000 volt skutust í gegnum líkama hans og drápu hann samstundis.
Lögreglan og slökkviliðið mætti fljótlega á svæðið en þau óttuðust helst hryðjuverkaárás. Það sem blasti við þeim var hins vegar allt annað. Strákurinn hafði brunnið svo illa að í fyrstu var óvíst hvort um manneskju væri að ræða.
HEIMSKast er hlaðvarpsþáttur á vegum Mannlífs þar sem Adam David Wheeler og Björgvin Gunnarsson fara yfir heimskulegustu dauðdaga heims en af nógu er að taka. Vinirnir ræða einnig eigin heimsku og segja nokkrar vel valdar sögur af heimskupörum sínum í gegnum tíðina. Einnig má finna hlaðvarpið inni á Spotify.