Hamingjudagar í Hafnarfirði fara fram allan septembermánuð en þar er boðið upp á allskonar skemmtilegheit á borð við sjóbað, dáleiðslu og samverustundir. Síðastliðið þriðjudagskvöld fór fram svokallað Hamingjukvöld í Bæjarbíói en kvöldið var uppfullt af hlátri, gleði, samveru og söng, eins og það er orðað á heimasíðu Hafnarfjarðarbæjar. Þá var einnig boðið upp á góð ráð gegn einmannaleika og hvernig rækta má sjálfskærleika sem hægt er að taka með sér í leiðinni að hamingjunni.
Það var bæjarstjórinn sjálfur, Rósa Guðbjartsdóttir sem opnaði kvöldið en Guðrún Árný söngkona stýrði samsöng og sló síðan lokataktinn á kvöldinu. Þá fór Aðalbjörg Stefanía Helgadóttir, hjúkrunarfræðingur og höfundur bókarinnar Einmana, yfir leiðir út úr einmanaleikanum og Theodór Francis Birgisson, ráðgjafi og vikulegur gestur í Bítinu á Bylgjunni talaði um tengsl á léttum nótum. Aukreitis fræddi lífsmarkþjálfinn og samskiptaráðgjafinn Linda Baldvinsdóttir gesti um sjálfsást og gleðisprengjan Sigga Kling, rithöfundur og fyrirlesari gaf gestum upp leiðina að hamingjunni.
Fyrir þau ykkar sem eruð svekkt að hafa misst af þessu skemmtilega kvöldi, þá þurfið þið ekki að örvænta því Hamingjudagar standa enn yfir en framundan eru Hamingjustund í Bæjarbíói, Hamingjuplöntugagna og Hamingjusöngur með Guðrúnu Árnýju.
