Gönguferðirnar Næsta Skrefið hefjast innan skamms
Ferðafélag Íslands hefur lengi þótt eitt magnaðasta útivistarfélag landsins enda ekki öll félög sem standa fyrir jafn góðri hreyfingu og útivist. Félagið er að safna saman í gönguhóp sem ber nafnið Næsta skrefið en sá hópur mun ganga saman 13 sinnum um helgar á mismunandi fjöll og fell. Þá verða vikulegar göngur á Úlfarsfell á fimmtudögum klukkan 18. Þetta er níunda árið sem verkefninu er haldið úti.
Meðal annars verður gengið upp Geitafell, Meðalfell og Þórðarfell. Þá verður farið í helgarferð í Landmannalaugar í lok september. Fyrsta gangan verður sunnudaginn 10. september en eru göngurnar ýmist á laugar- og sunnudögum. Gönguhópurinn er fyrir þau sem eru að stíga sín fyrstu skref á fjöll og þau sem vilja koma sér aftur að stað eftir hlé.
Göngurnar eru samblanda af heilsurækt og fræðslu en mikið fjör og gleði verður í ferðunum eins og öðrum ferðum Ferðafélagsins. Umsjónarmenn ferðanna eru þau Reynir Traustason og Guðrún Gunnsteinsdóttir. Þau eru þaulreyndir göngugarpar sem elska ekkert meira en fjallaloftið og gleði. Hundar eru velkomnir.
Hægt er að skrá sig hérna
