Atli Þór Fanndal, fyrrverandi starfsmaður Pírata, fullyrðir að Píratar séu á mörkum þess að falla af þingi vegna vænisýki Þórhildar Sunnu Ævarsdóttur, aðaltalsmanns flokksins, sem líði fyrir skort á leiðtogahæfileikum. Aðeins eru nokkrir mánuðir síðan miklir kærleikar voru á milli Atla Þórs og Þórhildar Sunnu. „Við ætlum að koma flokknum í ríkisstjórn,“ sagði Atli við Vísi þegar hann var ráðinn. Öráum mánuðum hætti hann í fússi. Nú loga eldar haturs og Atli hraunar yfir fyrrverandi yfirboðara sinn sem hann sakar um að dreifa gegn sér óhóðri. Það skondna er að Atli Þór sagði sig einnig frá Pírötum árið 2018.
„Hún Þórhildur Sunna ákvað að njósna um meðlimi Pírata vegna eigin vænisýki. Taldi einhverja byltingu gegn sér í gangi. Allt saman ímyndun. Það sem er ekki ímyndun er að flokkurinn mælist með helming fylgis, ekkert traust og er að detta út af þingi. Í því sjást leiðtogahæfileikar Þórhildar Sunnu …,“ skrifar Atli Þór á Facebook um helgina.
Atli Þór hefur átt erfitt með samskipti í nærumhverfi sínu. Hann hefur víða komið við á ferli sínum og gjarnan farið út með brauki og bramli. Um tíma vann hann fyrir VG á miðli sem hét Smugan. Seinna vann hann á DV um tíma en hvarf á braut þaðan. Atli Þór stofnaði vefmiðilinn Skástrik ásamt auðkonunni þáverandi, Lilju Skaftadóttur, en miðillinn entist stutt. Um nokkra hríð var hann framkvæmdastjóri Íslandsdeildar Transparency International en hætti þar snögglega og gerðist starfsmaður Pírata og var fljótlega sakaður um að reyna hallarbyltingu. „Píratar eru eitrað vinnuumhverfi og ég fagna því að vera laus undan húsbóndavaldi Þórhildar Sunnu, skrifar Atli að leiðarlokum.“
Nú bíða þess einhverjir, misspenntir, að sjá hvar Atli dúkkar næst upp í vinnu og hvaða hamfarir fylgi í kjölfarið …