Hörmungar Íslandsbanka halda áfram eftir að Birna Einarsdóttir bankastjóri var rekin. Sú ákvörðun að ráða innanbúðarmanninn Jón Guðna Ómarsson sem bankastjóra leggst illa í fólk og gagnrýnin á svikabrall starfsmanna bankans heldur áfram. Þá hefur Kvika banki slitið samrunaviðræðum við Íslandsbanka sem er gríðarlegt áfall. Gengi bankans á hlutabréfamarkaði skrapar botninn.
Ekkert hefur verið gefið upp um það hverjir úr hópi þeirra sem mesta ábyrgð bera þurfa að taka pokann sinn. Þannig er ekki vitað hvað verður með Eddu Hermannsdóttur fjölmiðlafulltrúa bankans og einn nánasta samstarfsmann Birnu. Edda þykir hafa farið ótroðnar slóðir í starfi sínu og beitt bankanum með undarlegum og grófum hætti. Útvarpsmaðurinn Jón Axel Ólafsson benti á það í Bítinu á Bylgjunni að þær stöllur hefðu hótað að hætta öllum viðskiptum við Sýn ef ekki yrði jafnt kynjahlutfall í fyrirtæknu sem rekur Stöð 2, Bylgjuna og Vísi. Þetta vakti mikinn ótta meðal stjórnenda Sýnar og varð að sögn til þess að karlmaður sem átti að taka við af Þorgeiri Ástvaldssyni í spjallþættinum Reykjavík síðdegis varð að víkja. Jón Axel lýsti inngripi Eddu og Birnu sem dæmi um þá firringu sem átti sér stað þar sem bankinn var farinn að skipta sér af innanbúðarmálum einstakra fyrirtækja.
Það mun væntanlega reyna á það hvort Jón Guðni hefur það bein í nefinu að hafna vinavæðingu og hreinsa út þá spillingu sem hefur verið inngróin í menningu bankans. Finnur Árnason og stjórn bankans hafa verk að vinna. Niðurstaðan ræður því hvort stjórninni verður sætt og bankinn réttir úr kútnum …