Eitt af stærri fréttamálum haustsins 1993 var þegar veiðifélagarnir Páll Magnússon, sjónvarpsstjóri Stöðvar 2, og undirmaður hans, Ólafur E. Jóhannesson, fréttamaður og núverandi blaðamaður Moggans, urðu fyrir því að skjóta fokdýran veiðihund í misgripum fyrir gæs.
Málið komst í hámæli þegar Pressan fjallaði um það og upplýsti að annarhvor þeirra hefði hleypt af skotinu. Hvorki Páll né Ólafur vildu þá upplýsa hvor þeirra ætti sök á drápinu. Allt fór svo á annan endann þegar Alþýðublaðið sagði frá því að Páll sjónvarpsstjóri hefði tekið í gikkinn. Ólafur skrifaði í framhaldinu grein í Moggann þar sem hann fordæmdi umfjöllun fjölmiðla sem hann kenndi við slúður. Jafnframt sagðist hann hafa sjálfur drepið hundinn.
Gárungar þess tíma voru snöggir til að uppnefna Ólaf með ósmekklegum hætti og kölluðu hann Ólaf hundaskýt. Þetta varð til að vekja upp samúð með aumingja Ólafi sem gerði ekki annað af sér en að þekkja ekki muninn á hundi og gæs …