Sólveig Anna Jónsdóttir, formaður Eflingar, slær út flesta þar sem kemur að sterkum lýsingum á mönnum og málefnum. Flestir sem rísa gegn henni fá á baukinn og eru gjarnan kallaðir nöfnum sem sjaldnast eru notuð í opinberri umræðu.
Ritari Eflingar, Ólöf Helga Adolfsdóttir, hefur oft fengið að finna fyrir klóm formannsins sem hefur ýmist talaða hana niður eða slaufað henni í félagsstarfinu. Ólöf hefur sagt að verkfallsjóður Eflingar eigi að greiða fólki bætur ef til verkbanns kemur og Agnieszka Ewa, fyrrverandi formaður, tekur í sama streng. „Aumingja Agnieszka Ewa og Ólöf Helga. Þær ætluðu sér stóra hluti í verkalýðshreyfingunni. Ætluðu að stýra Eflingu og sjálfu Alþýðusambandinu. Hvattar til dáða af SGS-formanna-hirðinni og hinum og þessum innan úr skrifstofuvirkinu …“ skrifar Sólveig Anna á Facebook og lýsir því að þær séu siðlaust og heimskt handbendi trylltrar auðstéttar og þess sturlaða Halldórs Benjamíns Þorbergssonar, framkvæmdastjóra Samtaka atvinnulífsins.
„Já, aumingja þessar konur. Það eru hræðileg örlög að hafa engan siðferðisáttavita, enga skynsemi og enga stéttavitund. Ekkert sem nær að stoppa sjúka þörfina fyrir athygli og strokur valdastéttarinnar. Það er ekki annað hægt en að upplifa vorkun með manneskjum sem að opinbera sig sem ekkert annað en auðvirðilega útsendara verstu óvina vinnandi fólks á landinu …,“ skrifar Sólveig Anna um félaga sína. Sjálfur Donald Trump á ekki roð í yfirlýsingar formannsins orðhvata …