Bjarni Benediktsson utanríkisráðherra er á erfiðum stað á þeirri píslargöngu sem sprottin er af fylgishruni flokks hans. Skoðanakannanir sýna flokk hans í sögulegu fylgishruni og sjálfur er hann lægst metni og óvinsælasti stjórnmálamaður landsins.
Nýjustu útspil Bjarna eru þau að hnjóða í hælisleitendur og fara þannig inn á veiðilendur sem gjarnan eru kenndar við lýðskrum. Í samræmi við þessa stefnubreytingu mætti ráðherrann í útvarpsþátt til Arnþrúðar Karlsdóttur á Útvarpi Sögu. Þarna mátti heyra einstaklega merkilegt viðtal um flóttafólk og leiðir til að losna undan oki þess. Útvarpsstjórinn og ráðherrann gengu í takti sem endurspeglar að Sjálfstæðisflokkurinn á samleið með stjórnendum Útvarps Sögu sem þekktir eru fyrir margt annað en mannúð og skynsemi.
Í miðju viðtali var Bjarna svo mikið niðri fyrir að honum svelgdist á og hann missti röddina. Arnþrúður greip þá til þess að gera auglýsingahlé svo Bjarni næði aftur tökum á rödd sinni. Þetta gekk eftir og skötuhjúin héldu áfram tali sínu um glæpafólk sem hingað kæmi í skjóli góða fólksins. Sjálfstæðisflokkurinn er kominn á nýjar slóðir …