Uppgjörið innan sjálfstæðiskvennafélagsins Hvatar í byrjun vikunnar mun örugglega draga dilk á eftir sér. Frambjóðendur Guðlaugs Þórs Þórðarssonar umhverfisráðherra til stjórnar lutu í lægra haldi fyrir stuðningsfólki Bjarna Benediktssonar formanns og Áslaugar Örnu Sigurbjörnsdóttur sem hafa nú tryggt sér yfirráð í félaginu og þar með hverjir veljast sem landsfundarfulltrúar og kjósa þannig forystu flokksins. Sígandi ólukka Sjálfstæðisflokksins í formannstíð Bjarna hefur orðið til þess að krafa er uppi um nýtt blóð í forystuna.
Helsti andstæðingur formannsins er Guðlaugur Þór sem talinn er sá líklegasti til að hreppa embættið ef Bjarni ákveður að hætta. Guðlaugur Þór var niðurlægður við skipun núverandi ríkisstjórnar þegar hann var sviptur utanríkisráðherraembættinu og settur í umhverfismálin. Hann tók því þegjandi. Það flýgur fyrir að Diljá Mist Einarsdóttir, þingmaður og trölltrygg Guðlaugi Þór, vilji verða ritari Sjálfstæðisflokksins. Liði formannsins hugnast ekki að gefa Guðlaugi Þór meðbyr af neinu tagi og vilja halda Diljá úti í kuldanum þrátt fyrir að hún þyki efnileg og skelegg sem stjórnmálamaður.
Smölun á aðalfund Hvatar bendir til þess að Bjarni ætli að sitja sem fastast og uppræta andstöðu við sig. Fari svo er spurning um það hvort Guðlaugur geri uppreisn eða sætti sig við enn og aftur við niðurlæginguna …