Skyndilegt og fyrirvaralaust brotthvarf Egils Arnar Jóhannssonar af forstjórastóli Forlagsins í liðinni viku vakti mikla athygli. Á sama tíma hætti eiginkona hans, Þórhildur Garðarsdóttir fjármálastjóri, störfum hjá Forlaginu.
Egill þykir lengst af hafa staðið sig afskaplega vel í þeim ólgusjó sem fylgir bókaútgáfu á tímum þar sem pappír er á undanhaldi. Forlagið er sannkallaður risi á bókamarkaði undir stjórn Egils en áður Jóhanns Páls Valdimarssonar, föður hans. Egill hefur sem minnst viljað segja til um ástæðurnar fyrir brotthvarfi hans og fjármálastjórans. Hann hefur svarað út og suður um að hann ætli sér að leggjast í hámáhorf á sjónvarpsseríum og almennt að hvíla sig. Hann var í stórviðtali við vin sinn Jakob Bjarnar Grétarsson á vefmiðlinum Vísi þar sem engu var svarað.
Kvittur er uppi um að hann munu taka við sem forstjóri hljóðbókarisans Storytel en sú staða losnaði þegar Stefán Hjörleifsson var látinn fara eftir að hafa stigið yfir mörk kvenna hjá fyrirtækinu. Egill þvertekur fyrir að þetta sé raunin og eftir stendur eitt risastórt spurningamerki vegna starfslokanna. Einhverjir giska á að hann og faðir hans, Jóhann Páll, ætli sér að fara aftur í samstarf um bókaútgáfu en ekkert liggur fyrir um það …