Páll Vilhjálmsson, kennari við Fjölbrautarskólann í Garðabæ og bloggari, stendur í ströngu þessa dagana. Hann hefur kallað yfir sig reiði stjórnenda Ríkisútvarpsins með umfjöllun sinni um „skattsvikamál“ Sigríðar Daggar Auðunsdóttur, umsjónarmanns Kastljóss. Páll fullyrðir að Sigríður hafi leigt út fjórar íbúðir í húsi sínu við Surðurgötu á airbnb án þess að gefa upp tekjur upp á milljónatugi. Þá segir sögukennarinn að Sigríður Dögg hafi notið náðar Bryndísar Gunnarsdóttur skattrannsóknastjóra sem hafi leyft henni að greiða álag og sekt í stað þess að fara til dómstóla með málið. Þessu til viðbótar gefur Páll til kynna að fjölmiðlafyrirtæki Sigríðar hafi unnið fyrir skattrannsóknastjóra. „Um það leyti sem skattsvikamál Sigríðar Daggar var á borði Bryndísar skattrannsóknastjóra stóð Bryndís í stórræðum í opinberri umræðu …,“ skrifar Páll.
Páll hefur ekki sýnt fram á gögn í málinu en fullyrðir að heimildir séu fyrir því að mál séu svona vaxin. Sigríður Dögg hefur einnig hafnað því að gefa upp þau gögn sem eru að baki „endurálagningu“ skatta vegna leiguíbúða hennar við Suðurgötu. Hún svarar ekki ítrekuðum spurningum Mannlífs um þetta efni sem gefur henni tækifæri til að hreinsa nafn sitt. Þess í stað gaf hún gaf einhliða yfirlýsingu á Facebook um að hún væri saklaus af áburðinum.
Víst er að ef um uppspuna er að ræða hjá sögukennaranum þá mun Sigríður Dögg geta náð út háum bótum í gegnum dómstóla. En ef satt reynist þá er hins vegar um að ræða spillingarmál af stærri gerðinni.
Stjórnendur Ríkisútvarpsins standa þétt að baki Sigríði Dögg sem var mætt í Kastljós í gær. Það er vísbending um að Stefán Eiríksson útvarpsstjóri og undirmenn hans telji hana saklausa og leggi nafn og heiður stofnunarinnar undir í málinu. Einu fréttir Ríkisútvarpsins af Páli og bloggi hans eru þær að krefja hann svara vegna umfjöllunar um málefni transfólks. Nokkur samstaða er meðal fjölmiðla í landinu um að spyrja ekki spurninga varðandi Sigríði Dögg og dularfulla skattamálið. Aftur á móti hefur verið boðað að málið verði tekið upp á Alþingi og kallað eftir gögnum …