Stjórnendur Ríkisútvarpins hafa gripið til þeirrar sparnaðaraðgerðar að fjarlægja Egil Helgason, sjónvarpsmanninn dáða en umdeilda, úr Silfrinu. Egill, sem er 63 ára, hefur stýrt Silfrinu um langt árabil og haft viðkomu á nokkrum sjónvarpsstöðvum. Hann er á meðal dýrari starfsmanna RÚV auk þess að vera þyrnir í augum hægriaflanna í landinu. Margur sjálfstæðismaðurinn telur að kappinn sé hallur undir vinstrið og því ófært að hafa hann í því starfi að lýsa pólitískum kappleikjum og velja þá sem fá að koma í sviðsljósið. Þá hefur hann þá áráttu að bergmála skoðunum sínum á samfélagsmiðlum og vera dómharður.
Undanfarin ár hefur fjarað undan Agli. Þess er skemmst að minnast að settur var annar stjórnandi í þáttinn á móti honum en nú var komið að því að slá hann alveg af. Skarphéðinn Guðmundsson dagskrárstjóri tók þá ákvörðun í samráði við Stefán Eiríksson útvarpsstjóra. Sigríður Hagalín Björnsdóttir, Valgeir Örn Ragnarsson og Bergsteinn Sigurðsson taka við þættinum sem fer af sunnudögum yfir á mánudagskvöld.
Egill verður þó áfram á jötunni hjá RÚV þar sem hann stýrir Kiljunni og heldur áfram að gera þætti um hitt og annað. Hann er því ekki á vonarvöl …