Flugfélagið Play glímir við erfiðleika þessa dagana. Mikið tap er á rekstrinum sem samkvæmt áætlunum átti að vera kominn í jafnvægi. Innandyra hefur verið ólga og þess er skemmst að minnast að frumherjinn Birgir Örn Jónsson forstjóri hrökklaðist úr starfi og snéri sér aftur að trommuleik með hljómsveitinni Dimmu. Einar Örn Ólafsson, einn aðaleigenda félagsins og stjórnarformaður, tók sjálfur við forstjórastarfinu og sinnir því í öllum þeim jafnvægistruflunum sem fylgir flugrekstri. Eftir að Einar Örn tók við hefur reksturinn enn versnað. Nærtækt er að líta til utanaðkomandi þátta svo sem þess að ferðamenn eru teknir að forðast Ísland og okrið sem hér viðgengst.
Einar Örn er kokhraustur og ekkert á þeim buxunum að gefast upp. Hann er reyndar þekktur af því að kunna helstu trixin í viðskiptum. Frægt var þegar hann komst yfir ráðandi hlut í Skeljungi og varð forstjóri olíufélagsins. Hann ræddi stöðu Play við fréttamann Stöðvar 2 í gærkvöld sem spurði af magnaðri einlægni hve lengi félagið héldi út tapreksturinn. Forstjórinn svaraði eindregið að Play yrði alltaf til. Þetta er líklega eitt stærsta loforð sem hægt er að gefa. Flestir vona auðvitað að endalok Play verði ekki eins og gerðist hjá Skúla Mogensen og Wow en ekkert er öruggt undir sólinni. Play að eilífu, eða þannig …