Það styttist væntanlega í það að rannsókn lögreglusstjórans á Norðurlandi eystra á máli Páls Steingrímssonar skipstjóra ljúki. Páll var á sjúkrabeði þegar sími hans var afritaður og upp komst um samsæri svonefndra skæruliða Samherja sem unnu að því af alúð að sverta þá fjölmiðlamenn og aðra sem fjölluðu um Samherja á nótum sem stjórnendum fyrirtækisins líkaði ekki. Einn leiðtoga skæruliðanna var Þorbjörn Þórðarson, fyrrverandi fréttamaður, sem matreiddi greinar fyrir Pál og glefsaði í hæla fyrrum kollega sinna.
Fyrirtækið situr undir ásökunum um mútur, skattsvik og fleira. Rannsókn á þeim þætti Samherjamálsins miðar hægt. Grunur er uppi um að fyrrverandi eiginkona Páls hafi rænt síma hans og þannig ljóstrað upp um neðanjarðarstörf skæruliðanna. Málið er að því leyti fjölskylduharmleikur.
Aftur á móti hvílir allur þungi rannsóknar Páleyjar Borgþórsdóttur lögreglustjóra á því að upplýsa hver hafi byrlað fyrir Páli og hvaða fréttamenn hafi tekið við gögnum úr síma skipstjórans og upplýst um myrkraverkin. Það ber jafnvel á góma að viðkvæmar myndir Páls hafi komið fyrir augu fjölmiðlamanna og slíkt sé refsivert. Niðurstöðu rannsóknarinnar og framhaldi málsins er beðið með eftirvæntingu …