Feitri afsökunarbeiðni norska fjölmiðilsins Aftenposten innsikt vegna umfjöllunar blaðamannsins Lasse Skytt um Samherja er gríðarlega fagnað í höfuðstöðvum Samherja. Andlegur og veraldlegur leiðtogi félagsins, Þorsteinn Már Baldvinsson, brosir í gegnum tárin og skrifaði af þessu tilefni ávarp til samstarfsmanna sinna á vef félagsins, samherji.is.
Þar reifar hann afsökunarbeiðnina sem var tilkomin vegna hroðvirkni og sumpart vegna þess að Lars lét frá sér fara villur í greininni og leitaði ekki viðbragða Samherja sem fjallaði um spillingu á Íslandi og meint mútumál Samherja í Namibíu. Þorsteinn telur að þarna sé eini fjölmiðillinn, utan Morgunblaðsins, sem hafi manndóm til þess að biðjast afsökunar á skrifum Lasse Skytt. Málaferli standa nú í Nígeríu vegna meintra brota Samherja.
Lasse er lausaspenni sem hefur skrifað í nokkra fjölmiðla. Meðal þeirra sem endursagt hafa greinar eftir hann er Blaðamannafélag Íslands á vef sínum, press.is, en Lasse tók einmitt viðtal við Sigríði Dögg Auðunsdóttur, formann Blaðamannfélagsins, í tilefni af rannsókn Samherjamála. Höfundur endursagnarinnar er Auðunn Arnórsson, bróðir Þóru Arnórsdóttur, fyrrverandi ritstjóra Kveiks og eins sakbornings í Skæruliðamáli Páls Steingrímssonar skipstjóra sem var rændur farsíma sínum á sjúkrabeði.
Innan úr herbúðum Samherja heyrist að umfjöllun Lasse í erlendum miðlum hafi verið skipulögð á Íslandi og síðan vitnað í hana hérlends. Með ávarpi sínu er Þorsteinn Már að fórnarlambavæða Samherja á heimsvísu og víst er að málið gefur honum vind í seglin …