Ásmundur Friðriksson, alþingismaður Sjálfstæðisflokksins, á ekki upp á pallborðið hjá „góða fólkinu“ á Alþingi. Hann fylgir fast eftir skoðunum sínum sem gjarnan eru á skjön við þá sem aðhyllast frjálslyndi og kvenréttindi og dálítið í anda Donalds Trump. Hann er líka einhver allra þekktasti ökuþór landsins. Það komst í hámæli á sínum tíma að þingmaðurinn átti Íslandsmet í því að rukka almenning um milljónir króna á milljónir ofan fyrir akstur sinn um kjördæmið þvert og endilangt. Mörgum var misboðið en yfirstjórn Alþingis taldi reikningana réttlætanlega.
Eftir fjölmiðlafárið tók þingmaðurinn upp þann góða sið að hvíla jeppann öðru hvoru og ganga af nokkrum krafti um íslenska náttúru og njóta fegurðar landsins. Þetta þykir vera til fyrirmyndar en það hefur þó hamlað þingmanninum á göngunni að hné hans eru tekin að gefa sig. Hann bíður þess nú að komast í liðskipti en lýsti áhyggjum af því að hópur þingmanna fengi í gegn að útlendingar mættu koma til Íslands í fóstureyðingu og sliga heilbrigðiskerfið og þar með lengja biðlistana. Á meðan Ásmundur er á biðlistanum verður jeppinn að duga. Hann mun þó mæta tvíefldur til leiks þegar liðskiptin verða að baki …