Gréta María Grétarsdóttir, forstjóri Prís, hefur þegar haft gríðarleg áhrif á matvörumarkaði þar sem allt leikur á reiðiskjálfi eftir innkomu verslunar hennar sem opnaði í Smáranum í seinasta mánuði. Eftir að Bónus, Krónan og Nettó höfðu verið í friði með álagningu sem fékk viðskiptavini til að svitna er friðurinn úti og almenningur sparar sem aldrei fyrr á lægra vöruverði.
Gréta er öllum hnútum kunnug á þessum markaði þar sem hún gerði Krónuna að stórveldi á sínum tíma. Í dag er hún í samvinnu við Jón Ásgeir Jóhannesson, stofnanda Bónus, sem gerði þá keðju að stórveldi. Samstarf þeirra er mikil ógn við einokunarrisana.
Sindri Sindrason sjónvarpsmaður heimsótti Grétu Maríu á dögunum í þætti sínum, Íslandi í dag á Stöð 2. Þar kom fram að forstjórinn gengur í öll störf, raðar í hillur, ræður fólk og gerir það sem gera þarf.
Gréta var ekkert að spara stóru orðin og lofaði að Prís yrði alltaf lægst. „Á meðan ég er við völd verður Prís alltaf ódýrast,“ sagði hún og titringurinn á matvörumarkaði heldur áfram, neytendum til góða …