Árvakur, útgáfufélag Morgunblaðsins tapaði 240 milljónum króna í fyrra. Það þýðir að Guðbjörg Matthíasdóttir, auðkona frá Vestmannaeyjum, og fylgifiskar hennar töpuðu sem nemur 20 milljónum króna á mánuði eða 670 þúsund krónum á hverjum einasta degi við að halda úti blaðinu.
Mogginn hefur hrunið í lestri á undanförnum árum og er meðallestur á tölublað aðeins 22,6 prósent, samkvæmt Gallup en fór upp í 80 prósent þegar best lét. Þessi slaki lestur er þrátt fyrir aldreifingu blaðsins á fimmtudögum. Aftur á móti hefur vefur Moggans ágætan lestur. Það má ekki síst þakka slúðurfréttum Mörtu Maríu Jónasdóttur sem fylgist grannt með ástarlífi fólks og fasteignakaupum.
Eigendur Moggans hafa einna helst grætt á minningargreinum sem höfundar þurfa svo að greiða fyrir aðgang að. Auður Guðbjargar er sprottinn af kvótaeign hennar. Þá slapp hún fyrir horn með yfir 10 milljarða króna korteri áður en Glitnir féll í bankahruninu. Davíð Oddsson, ritstjóri Moggans, var þá seðlabankastjóri.
Haraldur Johannessen, framkvæmdastjóri, er brattur þrátt fyrir risatap sem hann kennir meðal annars falli Fréttablaðsins um. Hann boðar, í viðtali við sjálfan sig í Mogganum, stórsókn á næstunni en óljóst er í hverju hún felst en baklandið er helst djúpir vasar ekkjunnar frá Vestmannaeyjum …