Dauflegt er um að litast í hópi forsetaframbjóðenda þar sem enginn sem þykir frambærilegur í embættið hefur enn gefið kost á sér. Áhugaleysi almennings á væntanlegum kosningum er enda nær algjört.
Margir vonast til að Guðni Th. Jóhannesson, núverandi forseti Íslands, vendi sínu kvæði í kross og hætti við að stíga til hliðar. Einhverjir vilja að Katrín Jakobsdóttir, forsætisráðherra hætti sem forsætisráðherra og formaður VG, og taki slaginn um Bessastaði. Það er þó varla mögulegt og lítill bragur á því að yfirgefa sökkvandi skip VG. Næstráðandi hennar í flokknum, Svandís Svavarsdóttir, glímir við veikindi og enginn í sjónmáli til að taka við flokknum og forsætisráðuneytinu af henni.
Dagur B. Eggertsson, fyrrverandi borgarstjóri, er nefndur til sögu og talið að hann sé nú að íhuga hvort hann bjóði sig fram fyrir Samfylkingu í Reykjavík eða stefni á Bessastaði. Enn einn kosturinn er sá að Halla Tómasdóttir athafnakona sem á sínum tíma tapaði naumlega fyrir Guðna fari öðru sinni í framboð. DV fullyrðir að hún sé að hugsa sinn gang og muni að líkindum gefa kost á sér.
Gárungar nefna einnig þann möguleika að Davíð Oddsson, ritstjóri Moggans sem fékk slæma útreið í slagnum við Guðna fyrir átta árum, reyni aftur að láta draum sinn um að verða forseti rætast. Bent er á að hann sé á svipuðu reki og Donald Trump, fyrrverandi Bandaríkjaforseti, og auk þess með líkar skoðanir og lundarfar …