„Flokksgæðingur“ með bláa fingur

Mikið fjaðrafok er vegna þeirrar ákvörðunar Áslaugar Örnu Sigurbjörnsdóttur dómsmálaráðherra að rétta Jóni Steinari Gunnlaugssyni þann bitling að fá hann til að greina réttarkerfið og leggja til umbætur. Jón Steinar hefur legið undir því ámæli að verja málstað kynferðisbrotamanna. Meðal þeirra sem gagnrýna Jón Steinar eru Þórhildur Sunna Ævarsdóttir, þingmaður Pírata. Jón Steinar hefur skorað á hana og Rósu Björk Brynjólfsdóttur, þingmann Samfylkingar, að mæta sér opinberlega og takast á um þessi viðhorf. Þórhildur, sem er nýbúin að eignast barn, hafnaði þessu í samtali við Vísi og sagðist upptekin af „miklu merkilegri manni en Jóni Steinari þessa dagana“. Þá sagðist hún ekki nenna að munnhöggvast við hörundssáran flokksgæðing. Væntanlega vísar hún þar til þess að Jón Steinar hefur lengi verið einn af gæðingum Sjálfstæðisflokksins og sérstakur skjólstæðingur Davíðs Oddssonar, fyrrverandi forsætisráðherra sem kenndur var við Bláu höndina. Jón Steinar var einn af fingrum þess fyrirbæris. Hann var á sínum tíma skipaður hæstaréttardómari með ráðherravaldi eftir að hæfisnefnd hafði metið hann lágt í samanburði við aðra umsækjendur …