Það blæs ekki byrlega fyrir Einari Þorsteinssyni, nýjum borgarstjóra Reykvíkinga. Einar sveif inn í borgarstjórn við fjórða mann á vængjum slagorðs Framsóknarflokksins, „er ekki bara best að kjósa Framsókn?“. Einar var áður vinsæll sjónvarpsmaður og þykir hafa pólitíska útgeislun. En guðsgjafirnar duga ekki til. Nú mælist Framsókn í borginni í útrýmingarhættu með einungis fjögurra prósenta fylgi í stað tæplega 19 prósenta sem var niðurstaða kosninganna. Þetta þýðir afhroð ef spá Maskínu raungerist.
Einar tók við borgarstjórastólnum á þessu ári af Degi B. Eggertssyni og situr út kjörtímabilið. Hrollvekja hans er að kosningar fari á þann veg sem könnunin gefur til kynna. Stærsti flokkurinn í Reykjavík er Samfylking sem mælist með 26 prósent. Sjálfstæðisflokkurinn er í kjölfarinu með 23 prósent.
Könnunin er, eins og fleiri kannanir, vísbending um að Framsóknarflokkurinn sé búinn að missa það fylgi sem hann fékk í síðustu kosningum. Þar á bæ horfa menn nú til formannsins, Sigurðar Inga Jóhannssonar, sem ber ýmis þreytumerki. Er ekki bara best að skipta um formann heyrist úr skúmaskotum …