Staðan hjá fjölmiðlarisanum Sýn er beinlínis skelfileg ef litið er til gengis hlutabréfa félagsins á markaði. Hlutabréfin náðu sögulegum botni á föstudaginn. Verðmæti félagsins er nú einungis þriðjungur þess sem talið er að fáist með því að leysa það upp. Ofan á vantrú markaðarins bætist að fólksflótti er frá félaginu. Nú síðast tók Heimir Már Pétursson fréttamaður hatt sinn og staf og yfirgaf Sýn. Heimir var útnefndur blaðamaður ársins í fyrra af Blaðamannafélagi Íslands. Hann hefur haldið úti þætti um stjórnmál á Stöð 2 sem þykir ekki hafa skilað nægu áhorfi.
Hermt er að stjórn og stórir hluthafar séu sáttir með frammistöðu Herdísar Fjeldsted forstjóra sem hagræðir að sögn með því að reka dýrt og vannýtt starfsfólk og létti þannig á launakostnaði. Fullyrt er að Herdís hafi náð að langleiðina að hagræða í rekstrinum til að ná jafnvægi. Vandinn er hins vegar sá að áskrifendur hafa verið á sama flótta og starfsfólkið og gatið sem þarf að fylla stækkar stöðugt.
Annar þáttur í aðgerðum Herdísar er sá að endurskilgreina (rebranda) vörumerki félagsins. Þannig er rætt um að Stöð 2 verði einfaldlega Sýn og efnisþættir verði Sýn Sport og svo framvegis. Mannlíf hefur sent Herdísi fyrirspurn um það hvort dönsk auglýsingastofa, Coplus, sé þar með í ráðum. Hún hefur ekki svarað.
Vonir hluthafanna, sem hafa tapað milljörðum króna á fjárfestingunni, standa til þess að Enski boltinn muni bjarga rekstrinum. Sýn náði boltanum af Símanum og eru milljarðar þar undir. Nú liggja menn á bæn og vona að ekkert fari úrskeiðis í þeim efnum sem myndi drepa allra vonir um upprisu Sýnar …