Ingólfur Þórarinsson, betur þekktur sem Ingó veðurguð, er kominn með nóg af því að vera úthrópaður sem níðingur. Hann gerir þau örlög sín að umtalsefni á Facebook í gærkvöld þar sem hann rifjar upp að rúm þrjú ár eru síðan „einhver bylgja fór af stað“ um að hann um að hann væri níðingur. Ingó segir að herferðin hafi byggt á nafnlausum sögum þriðja aðila. Færslan er sett fram í samhengi við það að hann verður með tónleika í Skógarböðunum í Eyjafirði.
Hann segir að málið hafi tekið mjög á fjölskyldu sína og vini en sjálfur hafi hann ákveðið að halda sínu striki þar sem timinn myndi leiða í ljós sakleysi hans. Nafnlaust bull hafi orðið að „snjóflóði“ en erfitt að sanna sakleysi. Ingó segist hafa reynt sitt besta og spilað mikið en ótilgreint fólk reyni að eyðileggja alla hans viðburði.
Hann gagnrýnir að löggjafinn verji fólk ekki gegn neteinelti og ofbeldi og fjölmiðlar taki þátt í mannorðsmorðum og beygi siðareglur. Hann segist aldrei hafa sætt ákæru fyrir ofbeldisbrot og einungis ein kona hafi nafngreint sig í tengslum við slíkt. Síðar hafi komið í ljós að „sú kona laug í hvert skipti sem hún opnaði munninn“. Ingólfur telur að haldi áfram sem horfir muni koma til þess að ofbeldi verði eina svarið. Óljóst er hvað tónlistarmaðurinn meinar með því en hann segir vera nóg komið.
Færsla hans hefur vakið bæði reiði og samúð á samfélagsmiðlum. Hann er ýmist sakaður um að þagga niðri í þolendum eða að standa í baráttu sem eigi fullan rétt á sér …