Kristinn H. Gunnarsson, ritstjóri bb.is á Ísafirði, fer sjaldnast troðnar slóðir í málflutningi sínum. Hann er ákafur stuðningsmaður virkjana og laxeldis í sjó. Hjartaskurðlæknirinn og baráttumaðurinn Tómas Guðbjartsson er yfirleitt á öndverðum póli við ritstjórann og hefur þurft að þola beinan óhróður fyrir vikið. Ritstjórinn hefur hiklaust pönkast á hjartalækninum. Þá notar hann gamalkunna tækni við að klekkja á fólki með því að afbaka nöfn þeirra. Þannig verður Bubbi Morthens að Bubba Morteins í grein Kristins til stuðnings laxeldis.
Nýjasta útspil Kristins, öðru nafni Kidda sleggju, snýr að þeim umhverfisslysum sem hafa orðið vegna þess að lax hefur sloppið úr kvíum. Kristinn skrifar langan pistil til stuðnings fiskeldi í sjó og finnur atvinnugreininni flest til góða. Þá fullyrðir hann að enginn skaði hafi hlotist af slysasleppingum af þeim ástæðum að erfðablöndun sé sáralítil.
Margir hafa skrifað athugasemdir undir grein ritstjórans. Þeirra á meðal er Tómas læknir sem gefur engan afslátt. „Þessi grein skrapar botninn í langri sögu BB,“ skrifar hann. Gríðarlegur hiti er í umræðunni og er Kristinn sakaður um að blokka þá frá athugasemdakerfi bb sem eru með mestar athugasemdir gegn málflutningi hans í þágu norskra auðkýfinga …