Bjarni Benediktsson, formaður Sjálfstæðisflokksins, á í vanda vegna sölu hlutabréfa Íslansbanka sem kallað hafa yfir bankann sekt upp á 1,2 milljarð króna. Sjálfur segist Bjarni ekki bera neina ábyrgð á sviksemi bankamanna sem nú hefur kostað Birnu Einarsdóttur bankastjóra starfið. Hvernig sem Íslandsbankamálið fer með Bjarna þá er altalað að hann sé á útleið. Fylgishrun plagar flokkinn undir hans stjórn og sjónarmið sjálfstæðismanna hafa orðið undir í ríkisstjórninni hvað varðar hvalveiðar og fleira.
Vitað er að Bjarni vill að tryggt verði að höfuðfjandinn, Guðlaugur Þór Þórðarson, fái ekki formannsstólinn. Stefnan hefur verið sú að Þórdís Kolbrún Reykfjörð Gylfadóttir varaformaður taki við sem formaður. En nú eru uppi efasemdir um Þórdísi og leiðtogahæfileika hennar. Lokun sendiráðs Rússlands þykir vísbending um frumhlaup hennar og að hún sé glámskyggn á stjórnmál. Rætt er um að Halldór Benjamín Þorbergsson, fráfarandi talsmaður vinnuveitenda, kunni að henta vel í embætti formanns. Þá beinast augu andstæðinga Guðlaugs Þórs að Áslaugu Örnu Sigurbjörnsdóttur, sem hefur látið í ljósi einbeittan áhuga á því að komast til æðstu metorða innan Sjálfstæðisflokksins …